《別了Mary Jane》
路過見到有妹妹著住對Mary Jane皮鞋，令我諗起自己細個都曾經有對Mary Jane，仲要係紫色麂皮㗎𠻹。
我仲記得啊，鞋邊有個花花金屬扣，而且有少少踭，著起行路時會咯咯聲響，好好玩㗎。每次穿起對鞋，我心中都會有無盡戲碼上演。一時幻想自己係古代貴族，一時幻想自己係古堡女主人，一時又扮下老師咁，樂不可支。因為咁，對鞋被我鐘愛得如珠如寶，就算臭到仆街都無減我對佢嘅喜愛。只要唔係落雨，一有機會出街我都會著。就算嗰日阿媽安排我著嗦嗦聲運動褲，完全唔襯之下我都會照著。
每次著呢對鞋出街我心情都理應好好，但因為太怕揩花太怕被人踩到，以至每行幾步我都會低頭望一望對鞋；行完樓梯、過完馬路、到餐廳坐低、身邊有任何細路經過我都會低頭望一望對鞋。基本上九成時間我都係低頭望緊自己對鞋。每唔小心揩花一撻，我就心痛一整日。可惜任我再儆惜，作為一個生長迅速嘅細路仔，鞋就算唔揩花，都會有唔啱著嘅一日。初頭頂住趾我都會照著出街，後來太痛再著唔落，只能迫於無奈放棄了。
我諗每個人生命中多少都出現過呢對「紫色麂皮Mary Jane」，可以係一啲物品、一件事、一個習慣、一個靚仔、一堆數字，甚至係一段關係。例如有個靚仔經常約你出街，令你覺得快樂，很好。但當佢唔再約你出街呢？你就不快樂了，甚至會胡思亂想。「係咪自己上次出到嚟講咗柒嘢呢？定係因為自己最近WFH個人肥咗少少佢唔鐘意？」然後就開始批判自己，到下次再見面時，人就自然變得神經兮兮。好似我著住對Mary Jane嗰陣咁，本應係一件開心事，但因為太執著，反而俾佢揸撚住咗個春袋，將自己快樂嘅決定權拱手相讓。
人生本無常，萬事萬物每一秒都變緊。就好似我細個對腳腳咁，每一秒極速都生長緊，只係自己唔覺。任你對一件事再小心翼翼，始終都會有需要放下嘅一日。而當你太執著於一件事，長期低頭望住佢，你就望唔到面前遼闊壯麗嘅世界，仲會俾佢牽住鼻子走𠻹，
雖然我對Mary Jane已經畀老母掉咗十世，但我心中嘅戲碼係唔會完。只要我想飾演古堡女主人就飾演古堡女主人，想飾演MV女主角就飾演個MV女主角，著咩鞋根本唔重要。可以因為一件事而快樂，但千祈唔好俾呢件事成為快樂嘅本身。如果快樂植根於自己之內，就邊個都攞唔走了。
IG: sis3ter
Search